Aquellos

Sentaos na sala, Antón y so madre fueron escuchando palabres que-yos dicíen qu'aquellos que llevaben dellos díes viviendo na casa vieya, qu'aquellos que fueren tan amables desque llegaren, qu'aquellos que-yos regalaren un quesu, unos chorizos y una pota con callos, qu'aquellos qu'entá nun traxeren el dineru l'alquiler, nun-yos diben pagar nin una perra.

Sentaos na sala, Antón diba tranquilizando los nervios primeros que diba treslladando a so madre, nerviosa desque viera la placa pero entá más desque conociera'l por qué d'aquella visita.
Cuando'l guardia marchó dexando una tarxeta y diciendo que lu tuvieren informáu si sabíen dalgo, Antón y so madre nun podíen creer lo que-yos taba pasando.

Silenciu

Antón abrió la puerta de casa namás que sonó'l timbre; y cuando vio la placa dorada enfrente los güeyos pasó-y muncho pela cabeza. Nun fueron munchos los minutos que pasaron desque abrió hasta que supo por qué aquel guardia taba en so casa.
Pero naquellos minutos pasó-y muncho pela cabeza. Sobre manera unu: l'alborecer anterior tuviera con tres amigos nel aparcamientu del campu fútbol oyendo cómo otru amigu llamaba a la radio pa cuntar unos problemes que nun yeren los reales. Ente rises y porros, ente billetes de mil y cachos de tabacu que corríen pel salpicaderu, ente fumu que s'adueñaba del interior del coche recibieron la vista d'un coche que s'averó a ellos coles lluces apagaes.
Los tres quietos y callaos decatáronse de quién yeren cuando enfrente d'ellos prendieron toles lluces del so coche que dio la vuelta y siguió'l so camín.
El silenciu entá duró unos segundos.

Multa

Multa

Déxenme abandonar el cuartón depués de que m'anuncien lo que me van costar los delitos que fici. Nun atiendo muncho pa lo que me dicen pero apúrrenme un papel onde ta too mui claro.
Lléolu y relléolu tol tiempu que paso delantre de la comisaría queriendo saber lo que facer a partir d'esti momentu.
Quitenme el carnet de conducir seis meses, inmovilicen el camión na cochera de la comisaría hasta que mande a daquién por él y tengo que pagar cuatro mil euros de multa.

Nueche

La nueche apuerta depués de pasar, nerviosa, hores y hores per un parque y cabo un ríu; esperando que vengan buscame.
Ceno por dos euros y mesiu una hamburguesa y una cocacola nun Macdonad's.
Cuando acabo vuelvo a la cabina dende la que llamara , ensin respuesta, delles hores enantes a Yerái y marco'l númberu de casa pero nun me lu garra naide. Vuelvo a llamar a Yerái pero'l so teléfonu nun da señal.

Cunto'l dineru que me queda y nun ye muncho.
Nun me paez que colo que me queda puea atopar un sitiu pa dormir pero alcuérdome qu'igual funciona la tarxeta de creitu. Camino per cais vacies a la gueta d'un llugar onde me dean cama.
Entrugo nuna pensión y al ver el mio dni dícenme que non y fáenme un mapa que nun me cuesta siguir hasta un hostal xuvenil onde me dan unes sábanes, una almuhada y una llave.
Enantes de buscar el cuartu llamo a Yerái y soi a falar con él.

Nueche

La nueche apuerta depués de pasar, nerviosa, hores y hores per un parque y cabo un ríu; esperando que vengan buscame.
Ceno por dos euros y mesiu una hamburguesa y una cocacola nun Macdonad's.
Cuando acabo vuelvo a la cabina dende la que llamara , ensin respuesta, delles hores enantes a Yerái y marco'l númberu de casa pero nun me lu garra naide. Vuelvo a llamar a Yerái pero'l so teléfonu nun da señal.

Cunto'l dineru que me queda y nun ye muncho.
Nun me paez que colo que me queda puea atopar un sitiu pa dormir pero alcuérdome qu'igual funciona la tarxeta de creitu. Camino per cais vacies a la gueta d'un llugar onde me dean cama.
Entrugo nuna pensión y al ver el mio dni dícenme que non y fáenme un mapa que nun me cuesta siguir hasta un hostal xuvenil onde me dan unes sábanes, una almuhada y una llave.
Enantes de buscar el cuartu llamo a Yerái y soi a falar con él.

Viaxe

Miren cansó dafechu de min.
Miren avisó a los guardies que m'esperen una nueche de la que voi facer la visita diaria.
Namás que pico a la puerta, ábrese y, enantes de poder sentir dalgo d'alegría por consiguir lo que quiero, salen dos guardies que me dexen inútiles les manes y lléenme un papel al que nun atiendo. Quiero grita-y dalgo a Miren pero de dientro nun me sal nada.
Baxo les escaleres a emburriones y métenme na parte d'atrás d'un coche blancu entamando pela cabeza.

Nel viaxe que faigo acompañáu nun hai nenguna palabra. Na mio cabeza, tolos pensamientos son pa Miren, pa lo mal que la traté, pa tolo que la quiero.

Hores

Paso hores sentáu nuna siella frente a una mesa y una siella onde nun hai naide pa falar conmigo. Paso hores viendo pasar el tiempu que cuerre nun reló nel que van cayendo los segundos, los minutos, les hores.
Pienso que, quiciabes, m’entruguen pola rapacina que llevé conmigo en camión. Pienso que, quiciabes, depués de colar corriendo pasó-y dalgo. Pienso que, quiciabes, dalguna cámara de seguridá grabó’l camión na gasolinera onde la garré.
Busco na mio cabeza pensar en daqué pa intentar tranquilizame, pero nun lo atopo anque piense nella.

Toulouse

Sé qu'en nada van venir por min. Sé qu'en nada van llevame de vuelta pa casa.

Salgo de la estación y entro nun supermercáu pa comprar un bollu de pan, quesu y una botellina de yogur de beber.
Tómolo a la puerta del supermercáu y colos güeyos busco una cabina que nun tardo n'atopar. Col dineru suelto, y marcando primero'l prefixu internacional, vuelvo a llamar a Yerái, pero anque da señal, nun me lo garra. De xuru que yá garró'l coche y ta en camín.