El final del branu

Acabóse'l branu, volví a facer esámenes y volvió a acabase la tranquilidá en mio casa.
Nun sé qué esperaben mios padres depués de qu'en xunu nun aprobara namás que ximnasia, plástica y matemátiques. Nun sé qu'esperaben depués de que nun ficiera en tol branu.
Los tres díes que fui al institutu, de la que llegaba a casa, repitía-yos lo que-yos llevo repitiendo desque entamé al institutu, que los milagros nunca esistieron nin esisten nin van esistir.

Acabóse'l branu, volví a facer esámenes y volvió a acabase la tranquilidá en mio casa. El silenciu cuasi sepulcral dio pasu a gritos y más gritos que m'echaben en cara tolo d'agora, tolo del branu, tolo de lo que va d'añu y tol tiempu pasáu desque nací.
Al final de los gritos zarré'l cuartu per dientro y metíme na cama. Nun salí d'ella mientres mios padres picaben a la puerta.
Cuando cansaron salí de la cama, preparé la maleta, salí pela ventana y crucié unos cuantos praos hasta llegar a la gasolinera de l'autopista. En total, desque salí de casa, poco más d'un cuartu d'hora.