Tarxeta

Doi milenta vueltes al móvil apagáu.
Dacuando préndolu pa ver les semeyes y los númberos de teléfonu guardaos na tarxeta de memoria.
Sé que naide me pue llamar, sé que nun pueo llamar a naide porque mio padre quitó-y la tarxeta hai dellos díes, cuando llegó la factura y vio tolo que yo gastara, que nun yera muncho más que lo que gastara otros meses. Pero esi poco más xuníu al poco más de mio padre y al poco más de mio madre fizo que me quitara la tarxeta.
Tuvi una tarde y una mañana entera (ensin dir al institutu) encerrada nel cuartu pensando en marchar de casa, pero nun lo fici. Nun sabía cómo.
Al mediodía siguiente salí a xintar porque mios padres pidiéronme perdón dende l'otru llau de la puerta y prometiéronme que too se diba iguar nun mes a lo máximo.


A partir d'aquella tarde siempre que quería llamar tenía que facelo dende'l móvil de mio padre o'l del mio madre cortándome cuando llegaba a los cinco minutos qu'entrambos llevaben siguiendo les aguyes del reló de la cocina.
A partir d'aquella tarde perdí llibertá y independencia.